Jahresbricht 2018

 

 

 

Üses Vereinsjahr het so richtig am 24. März mit Konzärt u Theater agfange. Mir hei sächs Mau vor fasch vouem Hus dörfe vortrage u schpile, u üses Beschte gä.  Am 19. April heimer du gmüetlich ir Waudhütte brätlet u die Zyt no chly la revue passiere. Merci aune wo zu däm schöne Abe öppis bitreit hei. Am 19. u 20. Mai heimer üses Jodlerzmorge düregfüert. Der Jodlerklub Port het mit sine schöne Lieder dä Alass mit singe bis zum Schluss wundervou umrahmt. Mir hei d’MZH vou zfrideni Lüt gha. Isch doch e schöne Pfingschtsunntig gsi. Aune es Merci für ihre gross Isatz.  Am 24. Juni heimer ds Jodler Open Air in Frieswil bsuecht u dert de Lüt mit üsne Lieder für Ungerhautig gsorget.

 

Üsi Jodlerreis isch am 10. u 11 Ougschte gsi. Mir si z‘ Chaunach mitem Mart Car via Spiez – dert hets e Kaffihaut gä – richtig Gemmipass gfahre. Dert im Hospitz heimer es feins Zmittag übercho. Aschliessend simer mit der Dampfbahn uf d’Furka gfahre. Bi schönschtem Wätter hei mir uf der Wallisersite es paar Lieder gsunge. Wo mer du düre Tunu düre si u uf der angere Site si usecho, hets uf dicke Näbu gha. U de bim „Boxestopp“ sofort ga bisle! Mit Kafi fertig u Wurscht hei mir üs gstercht u ou da es paar Lieder gsunge. De Lüt hets gfaue. Mir si de wider i die schöni Dampfbahn igschtige u bis uf Realp  gfahre. Dert hei mir wider zu üsem Car gwächslet. Üse Chauffeur het üs de zu üsem Hotel nach Altdorf gfüehrt. Am Abe nachem feine Znacht het de der Eint u der Anger no chlei z’Nachtläbe gnosse. Am nächschte Morge nam Zmorgenässe hets de zwo Gruppe gä.  Die einte si es Stück vom Weg der Schweiz bis zur Tellsplatte gwanderet, u die angere hei der Wäg mitem Schiff gmacht. Uf der Tellsplatte si mer de wider aui zäme gsi u si de mitem grosse Schiff bi schönschter Ussicht bis uf Luzärn gfahre. Die einte ir 2. Klass u es paari ir 1. Klass. Doch die vor 1. Klass hei si du churz vor Luzärn i die 2. Klass gschickt. Du heimer der Vierwudstättersee verlah u si bim KKL z’Luzärn usgschtige. Ou dert heimer eis g’jodlet. Wo du aui bi freiem Ufenthaut öppis ghaberet u trunke hei gha, simer de mit em Car wider richtig Chaunach gfahre. Merci viu mau de Organisatore Hansruedi Wegmüller u Bruno Tribolet für die schöni Reis.

 

Am 26. Ouguscht heimer ar Aarepredigt z’Niderried gsunge. Am 2. Septämber heimer am Seeländische in Port teil gno u die zwöi Lieder „Wenn’s im Uschtig z’Alpe geit“ u „Waldverspräche“ gsunge. Am 9. Septämber heimer am Gassefescht z’Barge mitgmacht.

 

Are Metzgete si mer gsi. Ufem Führstei bi Oppligers heimer e feini Metzgete gnosse u e schöne gmüetleche Abe verbracht. (12. Okt.), Bim Aebi Köbu heimer bim Frühschoppe am 28. Okt. Dörfe für Ungerhautig sorge u si de vom Köbu fein verchöschtiget worde. Am 11. Novämber heimer im Altersheim Aarbärg gsunge.

 

D’Jodlerwiehnachte heimer am 7. Dez. im Chrüz z‘ Chaunach gha, Am 14. Dez. simer, wie aui Jahr, a Murtemärit ga singe. Da heimer de ou üser wunderschöne nöie Jodlerjaggene igweiet. Merci Manuel für dini Organisation vo dene Jaggene. Üses Jahr heimer am 13. Januar 19 bir Abepredigt ir Chiuche z’Chaunach abgschlosse.

 

Merci aune für öie Ysatz ungerem Jahr.

 

Liebi Grüess, dr Presidänt

 

A. Köhli

 

Nächster Auftritt

!! Abgesagt !!

Aufgrund der aktuellen Corona-Situation sind alle Aktivitäten des Jodlerklubs bis auf weiteres eingestellt.

 

 

 

 

 

 

 

 

 

 

 

 

Möchtes Du

 Hättest du Lust mit dem Jodlerklub Schneeglöggli Kallnach zu singen und schöne Momente mit zu erleben dann melde dich doch bitte bei unserem Präsidenten Andreas Köhli, Kallnach unter der

Tel.Nr. +41 (0)79 489 44 78

 

Probetag Donnerstag 20:15h